ఈ చిత్రంలో పడుకొని ద్విచక్రవాహనం నడుపుతున్న వ్యక్తి నల్గొండ జిల్లా తిప్పర్తి మండలం మర్రిగూడ గ్రామానికి చెందిన కొత్త రమేష్‌. గీత కార్మికుడైన ఇతను ఎనిమిదేళ్ల క్రితం తాటి చెట్టుపై నుంచి ప్రమాదవశాత్తు కిందపడిపోయాడు. దీంతో రెండు కాళ్లతో పాటు వెన్నెముక దెబ్బతింది. ప్రస్తుతం మంచానికే పరిమితమయ్యాడు. కనీసం కూర్చునే అవకాశం కూడా లేదు. నాలుగెకరాల పొలం ఉన్నప్పటికీ సాగు చేయలేని స్థితి. భార్య, కూలీల సహాయంతో సాగు పనులు చేయిస్తున్నాడు. పొలం, ఇతర పనుల నిమిత్తం బయటకు వెళ్లేందుకు ప్రత్యేకంగా ద్విచక్ర వాహనాన్ని తయారు చేయించుకున్నాడు. ఇందుకోసం మూడు చక్రాల మోపెడ్‌ను కొనుగోలు చేసి పడుకోవడానికి వీలుగా బెడ్‌ను ఏర్పాటు చేశాడు. దాని మీద పడుకొని ఆ వాహనాన్ని నడుపుతున్నాడు. ఇలా వెళ్లడం కష్టంగా ఉన్నా తప్పడం లేదంటున్నాడు. తనకు ఇంటర్‌, 10, 9 చదువుతున్న ముగ్గురు కుమార్తెలున్నారని.. ప్రభుత్వం సహాయం అందిస్తే మరింత ఆత్మవిశ్వాసంతో బతుకుతానని రమేష్‌ వేడుకుంటున్నాడు.