షాబాద్‌, న్యూస్‌టుడే: సాంబారులో పడి చికిత్స పొందుతూ బాలుడు మృతి చెందిన ఘటన రంగారెడ్డి జిల్లా షాబాద్‌ పోలీసుస్టేషన్‌ పరిధిలో మంగళవారం వెలుగు చూసింది. ఏఎస్‌ఐ శంకర్‌రెడ్డి తెలిపిన వివరాల మేరకు.. సంగారెడ్డి జిల్లా టేక్మాల్‌ మండలం శేరిపల్లికి చెందిన సురేశ్‌ బతుకుదెరువు కోసం 8 నెలల క్రితం షాబాద్‌ మండలం సర్దార్‌నగర్‌ వచ్చి అక్కడే నివాసం ఉంటున్నారు. ఈ నెల 18న అదే గ్రామంలో వారి బంధువుల ఇంట్లో వేడుక ఉండడంతో అక్కడికి వెళ్లారు. అక్కడ సురేశ్‌ కుమారుడు మూడున్నరేళ్ల ఆరుష్‌ ఆడుకుంటూ వేడి సాంబారు పాత్రలో పడిపోయాడు. ఈ ప్రమాదంలో చిన్నారికి తీవ్ర గాయాలయ్యాయి. షాద్‌నగర్‌ ప్రభుత్వ ఆసుపత్రిలో ప్రథమ చికిత్స చేసి ఉస్మానియా ఆసుపత్రికి తరలించారు. అక్కడ చికిత్స పొందుతున్న చిన్నారి మంగళవారం మృతి చెందాడు.