ఇస్లామాబాద్: పాకిస్థాన్‌కు చెందిన ఓ వధువు పెళ్లిలో వినూత్న వేషధారణతో ఆ దేశ ఆర్థిక వ్యవస్థ తీరును బయటపెట్టింది. వివాహం సందర్భంగా మెడలో బంగారు ఆభరణాల బదులు టమాటాలతో తయారు చేసిన దండ వేసుకుని అందరి దృష్టినీ ఆకట్టుకుంది. దీనికి సంబంధించిన వీడియోను నైలా ఇనాయత్‌ అనే పాక్‌ పాత్రికేయురాలు ట్విటర్‌లో పోస్ట్‌ చేయగా వైరల్‌గా మారింది. పాకిస్థాన్‌లో గత కొద్ది రోజులుగా టమాటా ధర కిలో రూ.320కు చేరింది. దీంతో దేశంలో బంగారం మాదిరిగా టమాటా విలువ కూడా పెరిగిపోతుండడంతో తాను ఇలా వినూత్నంగా వేషధారణ చేసుకున్నానని వెల్లడించింది. మెడలో దండతో పాటు, చెవులకు కూడా టమాటాలతో చేసిన చెవిపోగులనే ధరించిన ఆమె వీడియో సామాజిక మాధ్యమాల్లో వైరల్‌గా మారింది. పలువురు నెటిజన్లు సైతం ఈ వీడియోపై చమత్కారంగా కామెంట్లు చేశారు.