ఇంటర్నెట్‌డెస్క్‌: నిండా నాలుగేళ్లు కూడా ఉండని ఓ బుడతడి క్రికెట్‌ వీడియో ప్రస్తుతం ఇంటర్నెట్‌లో వైరల్‌గా మారింది. అతడి బ్యాటింగ్‌ నైపుణ్యాలే అందుకు కారణం. వివరాల్లోకి వెళ్తే.. ఫాక్స్‌ క్రికెట్‌ సంస్థ తమ ట్విటర్‌ ఖాతాలో ఒక వీడియో పోస్ట్‌ చేసింది. అందులో టీషర్టు, డైపర్‌ ధరించిన ఓ బుడతడు బ్యాటు పట్టుకుని ఇంట్లో క్రికెట్‌ ఆడుతుంటాడు. అది పోస్ట్‌ చేస్తూ నైపుణ్యాత్మక క్రికెటర్‌లా ఆడుతున్నాడు అని ఆ సంస్థ పేర్కొంది. దీంతో ఆ వీడియోను చూసిన ఇంగ్లాండు మాజీ క్రికెటర్‌ ‘మైఖేల్‌ వాఘన్‌’ ఆ బుడతడి ఆటతీరుకు ఆకర్షితుడై తాను కూడా ట్విటర్‌లో షేర్‌ చేశాడు. గ్లౌవ్స్‌ కూడా ధరించి లాంగ్‌ ఆన్‌ షాట్లు, స్ట్రైట్‌ డ్రైవ్స్‌ ఇలా మంచి స్టిల్స్‌ ఇస్తూ బ్యాటింగ్‌లో తనదైన ప్రతిభ కనబరుస్తుండటంతో నెటిజన్లు ఆశ్చర్యపోతున్నారు. ఈ బుడతడి ఆటతీరును ప్రశంసిస్తున్నారు. ‘ఇదే అసలైన క్రికెట్‌ స్టైల్‌’ అని కొందరు, ‘సచిన్‌ తెందుల్కర్‌ మళ్లీ క్రికెట్‌లోకి రంగ ప్రవేశం చేశాడు’ అని మరికొందరు దీనిపై కామెంట్ల వర్షం కురిపించారు.