ముంబయి:  దేశీయ మార్కెట్లు సోమవారం ఫ్లాట్‌గా నమోదవుతున్నాయి. ఉదయం 9.56గంటల సమయంలో బాంబే స్టాక్‌ ఎక్స్ఛేంజీ సూచీ సెన్సెక్స్‌ 3 పాయింట్లు నష్టపోయి 40,318 వద్ద కొనసాగుతోంది. జాతీయ స్టాక్‌ ఎక్స్ఛేంజీ సూచీ నిఫ్టీ 6 పాయింట్లు నష్టపోయి 11,901 వద్ద ట్రేడవుతోంది. డాలరుతో రూపాయి మారకం విలువ 70.70 వద్ద కొనసాగుతోంది. ప్రారంభ ట్రేడింగ్‌లో భారీ నష్టాలతో ప్రారంభమైన సూచీలు క్రమంగా కోలుకున్నాయి. అయితే గత వారం భారీ రికార్డులు నమోదు చేసిన సూచీలు ఈ వారం స్థిరీకరణకు గురికావొచ్చని విశ్లేషకులు అంచనా వేస్తున్నారు. ప్రముఖ షేర్లు భారీ ధరల వద్ద ఉన్నందున మదుపర్లు లాభాల స్వీకరణకు మొగ్గుచూపొచ్చని అభిప్రాయపడ్డారు. ఈ నేపథ్యంలోనే మార్కెట్ల లాభాల జోరు తగ్గినట్లు తెలుస్తోంది. 

యెస్‌ బ్యాంక్‌, జీ ఎంటర్‌టైన్‌మెంట్‌, ఎమ్‌ అండ్ ఎమ్‌, ఐఓసీ, యూపీఎల్‌ షేర్లు లాభాల్లో కొనసాగుతుండగా.. గ్రాసిమ్‌, భారతీ ఇన్‌ఫ్రాటెల్‌, సన్‌ఫార్మా, సిప్లా, హెచ్‌సీఎల్‌ టెక్‌ నష్టాలు చవి చూస్తున్నాయి.