జో బైడెన్‌కు ప్రధాని మోదీ అభినందనలు

తాజా వార్తలు

Updated : 08/11/2020 10:27 IST

జో బైడెన్‌కు ప్రధాని మోదీ అభినందనలు

దిల్లీ: అమెరికా అధ్యక్ష ఎన్నికల్లో విజయం సాధించిన జో బైడెన్‌కు, ఉపాధ్యక్షరాలిగా బాధ్యతలు చేపట్టనున్న కమలా హారిస్‌కు భారత రాష్ట్రపతి రామ్‌నాథ్‌ కోవింద్‌, ప్రధాని నరేంద్ర మోదీ అభినందనలు తెలిపారు. క్షణక్షణం ఉత్కంఠగా సాగిన అధ్యక్ష ఎన్నికల్లో బైడెన్‌ మ్యాజిక్‌ ఫిగర్‌ 270ను దాటి పోయారు. ట్రంప్‌ 214 దగ్గరే ఆగిపోయారు. దీంతో 77 ఏళ్ల జో బైడెన్‌ అమెరికా అధ్యక్ష పదవీ కల సాకరమైంది. ఈ విజయం పట్ల ప్రపంచవ్యాప్తంగా ఆయనకు శుభాకాంక్షలు వెల్లువెత్తుతున్నాయి. ఆయన మద్దతుదారులు అమెరికా వ్యాప్తంగా సంబరాలు జరుపుకుంటున్నారు. 

అమెరికా 46వ అధ్యక్షునిగా పదవీ బాధ్యతలు చేపట్టున్న జో బైడెన్‌కు ప్రధాని మోదీ శుభాకాంక్షలు తెలిపారు. ‘‘ మీరు అద్భుతమైన విజయం సాధించినందుకు అభినందనలు. గతంలో భారత్‌-అమెరికా సంబంధాలను బలోపేతం చేయడంలో మీ పాత్ర అమూల్యమైనది. మీతో కలిసి పనిచేసేందుకు, ఇరు దేశాల సంబంధాలను మరింత ఎత్తుకు తీసుకెళ్లేందుకు ఎదురుచూస్తున్నాను’’ అని మోదీ పేర్కొన్నారు. 

మరోవైపు ఉపాధ్యక్షురాలిగా బాధ్యతలు చేపట్టనున్న భారత సంతతి వ్యక్తి కమలా హారీస్‌ విజయంపై ప్రధాని మరో ట్వీట్‌ చేశారు. ‘‘మీ విజయం మార్గదర్శకం. భారతీయ-అమెరికన్లందరికీ గర్వకారణం. మీ సహకారంతో భారత్‌-అమెరికా సంబంధాలు మరింత బలంగా ఉంటాయని విశ్వసిస్తున్నాను’’ అని పేర్కొన్నారు.

జో బైడెన్ విజయంపై భారత రాష్ట్రపతి రామ్‌నాథ్‌ కోవింద్‌ శుభాకాంక్షలు తెలిపారు. ‘‘అమెరికా అధ్యక్షునిగా ఎన్నికైన జో బైడెన్‌కు, ఉపాధ్యక్షురాలిగా బాధ్యతలు చేపట్టనున్న కమలాహారిస్‌కు శుభాకాంక్షలు. బైడెన్‌ విజయవంతంగా తన పదవిని నిర్వర్తించాలి. భారత్‌-అమెరికా సంబంధాలు మరింత బలోపేతం కావడానికి ఎదురుచూస్తున్నాం’’ అని రాష్ట్రపతి పేర్కొన్నారు. 

 



Advertisement

Tags :

మరిన్ని

జిల్లా వార్తలు
బిజినెస్
మరిన్ని
సినిమా
మరిన్ని
క్రైమ్
మరిన్ని
క్రీడలు
మరిన్ని
పాలిటిక్స్
మరిన్ని
జనరల్
మరిన్ని