UK Covid: యూకేలో ప్రైవేటు ల్యాబ్‌ నిర్వాకం.. 43 వేల మందికి తప్పుడు కొవిడ్‌ ఫలితాలు!

తాజా వార్తలు

Published : 15/10/2021 18:54 IST

UK Covid: యూకేలో ప్రైవేటు ల్యాబ్‌ నిర్వాకం.. 43 వేల మందికి తప్పుడు కొవిడ్‌ ఫలితాలు!

లండన్‌: యూకేలోని ఓ ప్రైవేటు ల్యాబ్‌లో ఆయా సమస్యల కారణంగా అందులో కొవిడ్‌ పరీక్షలు చేయించుకున్న దాదాపు 43 వేల మందికి తప్పుడు నెగెటివ్‌ ఫలితాలు వచ్చినట్లు స్థానిక ఆరోగ్య అధికారులు వెల్లడించారు. ఈ నేపథ్యంలో ఇక్కడి వోల్వర్‌ హాంప్టన్‌లో ఉన్న ఆ ల్యాబ్‌లో ఆర్టీ-పీసీఆర్‌ పరీక్షలను నిలిపివేసినట్లు యూకే ఆరోగ్య భద్రతా సంస్థ(యూకేహెచ్‌ఎస్‌ఏ) శుక్రవారం ప్రకటించింది. ‘ఆ ల్యాబ్‌లో దాదాపు నాలుగు లక్షల నమూనాలు పరీక్షించారు. అందులో చాలావరకూ నెగెటివ్‌ వచ్చాయి. కానీ, వాటిలో 43 వేల వరకు తప్పుడు నెగెటివ్‌ ఫలితాలు ఉండవచ్చు. సెప్టెంబర్ 8 నుంచి అక్టోబర్ 12 మధ్య ఈ రిజల్ట్స్‌ వచ్చాయి’ అని పేర్కొంది.

‘మరోసారి టెస్టులు చేయించుకోండి’

సదరు ల్యాబ్‌లో ఆర్టీ- పీసీఆర్‌ పరీక్ష చేయించుకుని నెగెటివ్‌ వచ్చినవారు.. మళ్లీ బయట టెస్ట్‌ చేయించుకుంటే పాజిటివ్‌ వస్తున్న నేపథ్యంలో ఈ వ్యవహారంపై నేషనల్ హెల్త్ సర్వీస్ (ఎన్‌హెచ్‌ఎస్‌) దర్యాప్తు చేపట్టింది. ఈ క్రమంలో ఈ విషయం బయటపడింది. దీంతో సదరు వ్యక్తులు మరోసారి టెస్ట్‌ చేయించుకోవాలని సూచించింది. మరోవైపు అధికారులు దర్యాప్తునకు పూర్తిగా సహకరిస్తున్నట్లు ల్యాబ్‌ను నిర్వహిస్తున్న ‘ఇమ్మెన్సా హెల్త్ క్లినిక్’ వెల్లడించింది. ఈ వ్యవహారంపై యూకేహెచ్‌ఎస్‌ఏలోని పబ్లిక్ హెల్త్ ఇన్సిడెంట్ డైరెక్టర్ డాక్టర్ విల్ వెల్ఫేర్ మాట్లాడుతూ.. ఆర్టీ- పీసీఆర్‌, ఎల్‌ఎఫ్‌డీ టెస్ట్ కిట్‌లలో ఎలాంటి లోపాలు లేవని, సదరు పరీక్షలు నిర్వహిస్తున్న ఇతర ల్యాబ్‌ల సేవలను నిస్సందేహంగా ఉపయోగించుకోవచ్చని పౌరులకు వివరించారు.

రోజుకు పది లక్షల మందికి..

దేశవ్యాప్తంగా ఆయా పరీక్షా కేంద్రాల్లోనూ ఈ తరహా సమస్యలు తలెత్తినట్లు డిపార్ట్‌మెంట్‌ ఆఫ్‌ హెల్త్ అండ్ సోషల్ కేర్(డీహెచ్‌ఎస్‌సీ) వెల్లడించింది. ఇదే క్రమంలో ఇంగ్లాండ్‌లోని స్థానిక అధికార సంస్థ ‘వెస్ట్ బెర్క్‌షైర్ కౌన్సిల్’ సైతం అక్టోబర్ 3- 12 మధ్య ప్రభుత్వ ఆధ్వర్యంలో న్యూబరీ షోగ్రౌండ్ సైట్‌లో కొవిడ్‌ పరీక్షలు చేయించుకున్న నివాసితులు మరోసారి టెస్టులు చేయించుకోవాలని సూచించడం గమనార్హం. తప్పుడు నెగెటివ్‌ ఫలితాలు వచ్చినందునే ఈ సూచన వెలువరించినట్లు పేర్కొంది. మరోవైపు ఈ తప్పుడు ఫలితాల విషయంలో పౌరులు ఆందోళన వ్యక్తం చేస్తున్నారు. యూకేలో ప్రస్తుతం రోజుకు 10 లక్షల మందికి కొవిడ్‌ పరీక్షలు నిర్వహిస్తున్నారు.


Advertisement

Tags :

మరిన్ని

జిల్లా వార్తలు
బిజినెస్
మరిన్ని
సినిమా
మరిన్ని
క్రైమ్
మరిన్ని
క్రీడలు
మరిన్ని
పాలిటిక్స్
మరిన్ని
జనరల్
మరిన్ని