close
సుప్రీంలో కక్షిదారుల వాదనలివీ

అయోధ్యపై వైఖరిని వినిపించిన పిటిషనర్లు
  లిఖిత పూర్వకంగానూ అభిప్రాయాల అందజేత
ఈనాడు, ప్రత్యేక విభాగం

అయోధ్యలోని ‘రామజన్మ భూమి-బాబ్రీ మసీదు స్థల వివాద కేసు’లో... తాము మొదటి నుంచీ వినిపిస్తున్న వాదనలకే కక్షిదారులు చివరి వరకూ కట్టుబడి ఉన్నారు. ఈ వివాదాస్పద భూమిని మూడు సమాన భాగాలుగా చేయాలని అలహాబాద్‌ హైకోర్టు ఇచ్చిన తీర్పును వ్యతిరేకిస్తూ సుప్రీంకోర్టులో 14 అప్పీళ్లు దాఖలయ్యాయి. వీటిపై సుప్రీం సీజే జస్టిస్‌ రంజన్‌ గొగొయి అధ్యక్షతన ఏర్పాటైన ఐదుగురు సభ్యుల రాజ్యాంగ ధర్మాసనం 40 రోజులపాటు విచారణ చేపట్టింది. తర్వాత లిఖితపూర్వకంగానూ కక్షిదారుల నుంచి అభిప్రాయాలు కోరింది.

రాంలల్లా విరాజ్‌మాన్‌

మొత్తం వివాదాస్పద ప్రాంతాన్ని రాంలల్లాకు మాత్రమే కేటాయించాలి.
* వివాదాస్పద ప్రాంతంలోని ఏభాగాన్నీ నిర్మోహి అఖాడాకు గానీ, ముస్లిం కక్షిదారులకు గానీ కేటాయించకూడదు.

రామజన్మ భూమి పునరుద్ధరణ సమితి

వివాదాస్పద ప్రాంతంలో రామమందిర నిర్మాణానికి మాత్రమే అనుమతివ్వాలి.ఆలయం నిర్మించిన తర్వాత దాని నిర్వహణ బాధ్యతలను చూసుకోవడానికి ఒక ట్రస్టును ఏర్పాటు చేయాలి.

నిర్మొహి అఖాడా

ఒకవేళ తీర్పు హిందూ కక్షిదారులకు అనుకూలంగా వస్తే... ప్రతిపాదిత రామ మందిరంలో పూజా కైంకర్యాల హక్కు మాకే ఇవ్వాలి.
* రామమందిర నిర్మాణానికి అనుమతి ఇవ్వాలి. నిర్మాణం తర్వాత ఆలయ నిర్వహణ హక్కులనుమాకే అప్పగించాలి.
* అలహాబాద్‌ హైకోర్టు 2010లో ఇచ్చిన తీర్పును సుప్రీంకోర్టు సమర్థిస్తే వివాదాస్పద స్థలంలో ముస్లింలు ఎలాంటి నిర్మాణాలు చేపట్టకూడదు. అక్కడ వారికి లభించే స్థలాన్ని రామ మందిరాన్ని నిర్మించుకునే నిమిత్తం హిందువులకు దీర్ఘకాలిక లీజుకు ఇచ్చేలా ఆదేశించాలి.
* వివాదాస్పద ఆవరణకు వెలుపల మసీదు నిర్మాణం నిమిత్తం ముస్లింలకు భూమిని సమకూర్చేలా ప్రభుత్వాన్ని ఆదేశించాలి.

సీల్డ్‌ కవర్‌పై అభ్యంతరాలు

ముస్లిం పార్టీలు తమ అభిప్రాయాలను సీల్డ్‌ కవర్‌లో కోర్టుకు సమర్పించారు. కోర్టు తీర్పునిచ్చే సమయంలో ఈ గొప్ప దేశానికున్న రాజ్యాంగ విలువలను కాపాడాలని కోరారు. సీల్డ్‌కవర్‌లో వాదనలు సమర్పించడం పట్ల హిందూ పక్షాలు అభ్యంతరం వ్యక్తం చేశాయి. కేసు విచారణ చివరిరోజు... వివాదాస్పద స్థలంపై హక్కులు వదులుకోవడం ద్వారా వివాదాన్ని పరిష్కరించుకోవడానికి వక్ఫ్‌బోర్డ్‌ ఛైర్మన్‌ అంగీకరించినట్లు వార్తలు వెల్లువెత్తాయి. అయితే ముస్లిం పార్టీలు వాటిని ఖండిస్తూ ఉమ్మడి ప్రకటన వెలువరించాయి.

అఖిల భారత హిందూ మహాసభ

డిక్రీ ఇవ్వబోయే ఆస్తిపై మాకు పూర్తి పాలనాధికారాలు కల్పించాలి.
వివాదాస్పద ప్రాంతంలో నిర్మించనున్న రామాలయ నిర్వహణ బాధ్యతలు చూసుకోవడానికి ఒక ట్రస్టును ఏర్పాటు చేయాలి.
సదరు ట్రస్టుకు న్యాయస్థానమే ఒక అధికారిని నియమించాలి.

సున్నీ వక్ఫ్‌బోర్డు

అయోధ్యలోనిది బాబ్రీమసీదు స్థలమే. 1992, డిసెంబరు 6 నాటికి బాబ్రీ మసీదు ఎలా ఉండేదో అలాగే కొత్త మసీదును పునర్నిర్మించాలి.

షియా వక్ఫ్‌ బోర్డు

* ముస్లిం పక్షాలు వివాదాస్పద ప్రాంతంపై హక్కులు కోరవద్దు.
* అయోధ్యలోని వివాదాస్పద ప్రాంతంలో రామాలయం నిర్మించాలి.
* సంబంధిత స్థలానికి మేమే హక్కుదారులం.
* అలహాబాద్‌ హైకోర్టు తీర్పులో సున్నీ వక్ఫ్‌బోర్డుకు ఇచ్చిన భూమిని హిందూ కక్షిదారులకే కేటాయించాలి.

గోపాల్‌సింగ్‌ విశారద్‌

మసీదు నిర్మాణానికి ముందు నుంచే అక్కడున్న ఆలయంలో మా వంశస్థులు తరతరాలుగా పూజలు చేస్తూవచ్చారు. కొత్తగా నిర్మించే రామాలయంలో పూజలుచేసే రాజ్యాంగ హక్కు మాకే ఉంటుంది. కేసులో ఎలాంటి రాజీ ప్రయత్నాలకు తావుండొద్దు.

ముఖ్యాంశాలు

జిల్లా వార్తలు

దేవతార్చన


రుచులు
+

© 1999- 2019 Ushodaya Enterprises Pvt.Ltd,All rights reserved.
Powered By Margadarsi Computers

Android PhonesApple Phones

For Editorial Feedback - eMail: infonet@eenadu.net
For Digital Marketing enquiries Contact : 9000180611, 040 - 23318181 eMail :marketing@eenadu.net
Best Viewed In Latest Browsers

Terms & Conditions   |   Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.