close
రివర్స్‌ ఎందుకు? 

పోలవరం రీ టెండరింగ్‌పై నివేదిక ఇవ్వండి 
ప్రాజెక్టు అథారిటీని ఆదేశించిన కేంద్రం 
ఈ వారాంతంలో అందించనున్న పీపీఏ

ఈనాడు, దిల్లీ: పోలవరం ప్రాజెక్టు రివర్స్‌ టెండరింగ్‌పై కేంద్ర జలవనరుల శాఖ పోలవరం ప్రాజెక్టు అథారిటీ (పీపీఏ)ని నివేదిక కోరింది. దీనివల్ల ప్రాజెక్టు జాప్యం కావడంతోపాటు, వ్యయం కూడా పెరుగుతుందని అటు కేంద్ర మంత్రి, ఇటు అథారిటీ చెప్పినా.. ఏపీ ప్రభుత్వం పాత కాంట్రాక్ట్‌ రద్దు చేసి కొత్తగా టెండర్లు పిలవడానికి దారి తీసిన కారణాలపై నివేదిక ఇవ్వాలని ఆదేశించింది. కేంద్ర జలశక్తి శాఖ మంత్రి గజేంద్రసింగ్‌ షెకావత్‌ ఆదేశాల మేరకు పోలవరం ప్రాజెక్టు అథారిటీ ప్రస్తుతం నివేదిక తయారీలో నిమగ్నమైంది. ఈ వారంలోపు దాన్ని ఆయనకు అందించనుంది. ఇప్పటివరకు పోలవరం నిర్మాణం సాగిన తీరు, రాష్ట్రంలో ప్రభుత్వం మారిన తర్వాత నుంచి అందులో వచ్చిన మార్పులు, టెండర్‌ రద్దు వల్ల ఎదురయ్యే సమస్యలన్నింటినీ నివేదికలో పొందుపరచనున్నట్లు తెలిసింది. ఇందులో తామేమీ అభిప్రాయాలు జోడించబోమని, ఇప్పటివరకూ చోటుచేసుకున్న వాటిని మాత్రమే పొందుపరుస్తామని పీపీఏ అధికారులు వెల్లడించారు. ఈ నెల 2న లోక్‌సభలో ఆనకట్టల రక్షణ బిల్లుపై జరిగిన చర్చ సందర్భంగా కేంద్ర మంత్రి గజేంద్రసింగ్‌ షెకావత్‌ మాట్లాడుతూ పోలవరం రివర్స్‌ టెండర్లు ప్రాజెక్టు నిర్మాణానికి అవరోధంగా మారతాయని వ్యాఖ్యానించారు. దానివల్ల ప్రాజెక్టు వ్యయం పెరుగుతుందని, ఎప్పటికి పూర్తవుతుందో చెప్పలేమన్నారు. 14వ తేదీన గ్రామీణ స్వచ్ఛ సర్వేక్షణ్‌ గురించి వెల్లడిస్తున్న సందర్భంగా విలేకర్లు రివర్స్‌ టెండరింగ్‌పై గజేంద్రసింగ్‌ను ప్రశ్నించారు. ‘‘అన్నీ గమనిస్తున్నాం. ఏం జరుగుతుందో చూద్దాం’’ అని ఆయన బదులిచ్చారు. ఈ నేపథ్యంలో రీటెండర్‌ నిర్ణయాన్ని విరమించుకోవాలని ఈ నెల 16న పోలవరం ప్రాజెక్టు అథారిటీ ఏపీ ప్రభుత్వానికి లేఖ రాసింది. దాన్ని బేఖాతరు చేస్తూ ప్రభుత్వం మరుసటిరోజే కొత్త టెండర్లను పిలుస్తూ నోటిఫికేషన్‌ జారీ చేసింది. ఈ పరిణామాల నేపథ్యంలోనే కేంద్ర జలవనరుల శాఖ మొత్తం వ్యవహారంపై పూర్తిస్థాయి నివేదిక కోరినట్లు సమాచారం.

 

ముఖ్యాంశాలు

జిల్లా వార్తలు

దేవతార్చన


రుచులు
+

© 1999- 2019 Ushodaya Enterprises Pvt.Ltd,All rights reserved.
Powered By Margadarsi Computers

Android PhonesApple Phones

For Editorial Feedback - eMail: infonet@eenadu.net
For Digital Marketing enquiries Contact : 9000180611, 040 - 23318181 eMail :marketing@eenadu.net
Best Viewed In Latest Browsers

Terms & Conditions   |   Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.