High Blood Pressure: అధిక రక్తపోటు బాధితులు.. 30 ఏళ్లలో రెట్టింపు

తాజా వార్తలు

Published : 26/08/2021 11:28 IST

High Blood Pressure: అధిక రక్తపోటు బాధితులు.. 30 ఏళ్లలో రెట్టింపు

లండన్‌: ప్రపంచ వ్యాప్తంగా అధిక రక్తపోటు బాధితుల సంఖ్య గత 30 ఏళ్లలో రెట్టింపు అయినట్టు ప్రముఖ సైన్స్‌ జర్నల్‌ ‘ద లాన్సెట్‌’ వెల్లడించింది. ఈ బాధితుల్లో ఎక్కువమంది అల్ప, మధ్య ఆదాయ దేశాలకు చెందినవారేనని పేర్కొంది. 184 దేశాలకు చెందిన సుమారు 10 కోట్ల మంది రక్తపోటు ఫలితాలను అంతర్జాతీయ పరిశోధకుల బృందం విశ్లేషించింది. నమూనాలన్నీ గత మూడు దశాబ్దాల్లో, 30-79 ఏళ్ల వయసు వారికి చెందినవే తీసుకున్నారు. 1990లో 33.1 కోట్ల మంది మహిళలు, 31.7 కోట్ల మంది పురుషులు అధిక రక్తపోటుతో బాధపడగా... 2019 నాటికి బాధిత మహిళల సంఖ్య 62.6 కోట్లకు, పురుషుల సంఖ్య 65.2 కోట్లకు చేరినట్టు పరిశోధకులు లెక్కగట్టారు. అయితే, వీరిలో సగం మందికి అసలు తమకు అధిక రక్తపోటు సమస్య ఉందనే తెలియదట! బాధిత మహిళల్లో 53% మంది, పురుషుల్లో 62% మంది ఎలాంటి చికిత్స తీసుకోవడం లేదట. ప్రపంచ వ్యాప్తంగా ఏటా సంభవిస్తున్న 85 లక్షలకుపైగా మరణాలకు అధిక రక్తపోటే ప్రధాన కారణమని అధ్యయనంలో పాల్గొన్న లండన్‌ ఇంపీరియల్‌ కాలేజ్‌ ప్రొఫెసర్‌ మాజిద్‌ ఎజాటి చెప్పారు.

అధిక రక్తపోటు కారణంగా చాలామంది హృద్రోగం, మూత్రపిండ వ్యాధులు, పక్షవాతం బారిన పడుతున్నట్టు పరిశోధకులు ఆందోళన వ్యక్తం చేశారు. రక్తపోటును తగ్గించే చికిత్సతో పక్షవాతం ముప్పు 35-40%, గుండె వైఫల్య ప్రమాదం 50%, హృద్రోగాలు 20-25% తగ్గుతాయని తెలిపారు.  


Advertisement

Tags :

మరిన్ని

జిల్లా వార్తలు
బిజినెస్
మరిన్ని
సినిమా
మరిన్ని
క్రైమ్
మరిన్ని
క్రీడలు
మరిన్ని
పాలిటిక్స్
మరిన్ని
జాతీయ- అంతర్జాతీయ
మరిన్ని