మీరు కేకా? పోలికా! - meeru-keka?-Polika

యువతరంగ్

మీరు కేకా? పోలికా!

ఆర్ట్‌ ఆఫ్‌ లైఫ్‌
మీరు కేకా? పోలికా!

* వారాంతం. శ్రీను సోఫాలో కూర్చొని ఫేస్‌బుక్‌ చూస్తున్నాడు. ఫ్రెండ్స్‌ వీకెండ్‌ మస్తీ చేస్తూ ఫొటోలకు ఫోజులిచ్చారు. అవి చూశాడో లేదో... అప్పటి వరకూ లేని నిస్సారం ఆవహించింది. ఫొటోలు, రైట్‌అప్స్‌ని ఒకటి రెండుసార్లు చదివాడు. ఆలోచనలో పడ్డాడిలా... ‘నేనెందుకిలా. ఏం చేయలేకపోతున్నా. నాకెందుకు మస్తీ లేదు. ఒంటరిగా ఇంట్లో ఇలా.. లైఫ్‌లో మజా లేకుండా పోయింది. అందరూ భలే ఎంజాయ్‌ చేస్తున్నారు. నా లైఫ్‌ ఇలా ఎందుకు తగలడింది?’ అని. చూస్తున్న ఫోన్‌ని పక్కకు పడేసి శూన్యంలోకి చూస్తూ నిద్రలోకి జారుకున్నాడు.
* అప్పటి వరకూ తన పుట్టిన రోజు వేడుకే గొప్ప అని గ్రూపులో ఒకటే చర్చ. ఇది విన్నప్పుడల్లా సురేంద్రకి కిక్కే వేరు. కానీ, ఎప్పుడైతే తన బ్యాచ్‌లోని మరో స్నేహితుడి జన్మదిన వేడుకలు ట్విట్టర్‌లో చూశాడో మూడ్‌ మారిపోయింది. నా పుట్టినరోజు వేడుక కంటే అక్కడే ఫుల్‌ జోష్‌ ఉన్నట్టుగా గుర్తించాడు. నేనూ వెళ్లుంటే బాగుండేది అనుకుంటూ అన్ని ఫొటోలు చూస్తూ స్నేహితుడికి పుట్టిన రోజు శుభాకాంక్షలు చెప్పకుండానే సైన్‌అవుట్‌ అయ్యాడు.

* ఇన్‌స్టాగ్రామ్‌లో పిచ్చ యాక్టివ్‌ సౌమ్య. సెకన్‌కో సెల్ఫీ అన్నట్టుగా పోస్ట్‌ చేస్తుంది. గ్రూపులో మిగతా ఫ్రెండ్స్‌ చూస్తూ లైక్‌లు, కామెంట్‌లతోనే సరిపెట్టుకోరుగా. సౌమ్య కంటే భిన్నంగా ఫోజులిస్తూ ఫొటోలు పెడుతుంటారు. వాటిల్లో ఏదైనా ఆకట్టుకునేలా కనిపిస్తే చాలు. సౌమ్య మ్యూట్‌ అయిపోతుంది. ‘నా కంటే ఇతరులు పెట్టేవే బాగున్నాయ్‌. నేనెందుకు వాళ్లలా ఆలోచించలేకపోతున్నా’ అని ఒత్తిడికి లోనవుతుంది. తనేదైనా కొత్తగా ప్రయత్నిద్దాం అనే ఆలోచనే చేయదు. కొన్ని రోజులు ఇన్‌స్టాగ్రామ్‌ని ఓపెన్‌ చేయడానికి ఇష్టపడదు. చేసినా ఇతరులు కొత్తగా ఇంకేం పోస్ట్‌ చేశారా? అని ఒకటే వెతుకులాట.

‌సోషల్‌ లైఫ్‌లేని నెటిజన్‌ ఉండకపోవచ్చు ఫేస్‌బుక్‌, ఇన్‌స్టాగ్రామ్‌... లేకుంటే మరోటి!
రోజూ లాగిన్‌ అవడం.. స్క్రోల్‌ చేస్తూ చూడడం... ఫ్రెండ్స్‌ అప్‌డేట్‌ కనిపిస్తే ఆగి చూడడం...
ఎవరెవరు కలిసి ఉన్నారో, ఎలా మస్తీ చేస్తున్నారో పరిశీలించడం..
ఎప్పుడూ లైక్‌ చేయరు.. కామెంట్‌ ఇవ్వరు...
ఓ నిట్టూర్పు మాత్రం విడుస్తారు... ‘వాళ్లు ఎంచక్కా ఎంజాయ్‌ చేస్తున్నారు!
నేనే ఇలా.. ఏం చేయలేకపోతున్నా!’ అని చింతిస్తారు.
హై రిజల్యూషన్‌ తాకే తెరని నిస్సారంగా చూస్తుండిపోతారు.
వాళ్లెవరో తెలుసా? నేటి తరం పోలికగాళ్లు! కాదు కాదు... మిలీనియల్‌ పోలికగాళ్లు!!
యువతకి ఇప్పుడిదో ఒత్తిడి గుదిబండగా మారిందని మానసిక శాస్త్ర నిపుణులు హెచ్చరిస్తున్నారు. మీరూ ఆ బాపతేనా? జరసోచో!!

కొత్తగా ఉద్యోగంలో చేరిన స్నేహితుడు తన క్యాబిన్‌ ఫొటోలు పోస్ట్‌ చేసినప్పుడు.. చివరి నిమిషంలో మిస్‌ అయిన కాలేజీ పర్యటన హంగామాని వాట్సాప్‌లో చూసినప్పుడు... ఒకటే ఫీలింగ్‌. ‘ప్చ్‌. నేనెందుకు ఇలా. వాళ్లేమో అలా. నాకు నచ్చడం లేదు.’ అని. ఈ రకమైన ఆలోచనలు వ్యక్తిత్వ వికాసానికి, కెరీర్‌లో ఎదుగుదలకి పెద్ద అడ్డంకిగా మారొచ్చని మానసిక శాస్త్ర నిపుణులు చెబుతున్నారు. సోషల్‌ మీడియా వేదికలపై పోస్ట్‌ చేసేవే సంతోషానికి కొలబద్ధలు కావని, అంతకు మించిన జీవిత అనుభవాలు వాస్తవ ప్రపంచంలో ఉన్నాయని సూచిస్తున్నారు.

* ‘డీపీ’లో కనిపించేదే నిజమా?
* ‘చాలా సంతోషంగా ఉన్నా’ అంటూ పోస్టింగ్‌ల్లో ప్రదర్శించడం.దాన్నే నిజం అనుకోవడం ఓ భ్రమ. ఓ సందర్భాన్ని అప్పటికి ప్రపంచంతో పంచుకోవడమే! నిజమైన ఆనందం వేరే ఉందని గ్రహించాలి.

ప్రొఫైల్‌ పిక్‌, డిస్‌ప్లే పిక్‌లను కొందరు రోజుకో రకంగా మార్చేస్తుంటారు. ఇంకొందరు నెలలు, ఏళ్లయినా మార్పుండదు. దీంతో నిత్యం మార్పు చేసేవారి జీవితం చాలా జాయ్‌ఫుల్‌గానూ... మార్చని వారిది నిస్సారంగా ఉంటుందని ఎలా ఊహిస్తాం? చక్కని చిరునవ్వుతో ప్రొఫైల్‌ పిక్‌ పెట్టుకున్న వ్యక్తి నిజంగా అంతే సంతోషంగా ఉంటాడు అనుకుంటే పొరపాటే అవుతుంది. ఫొటోలో ఆ నవ్వు వెనక ఎన్నో బాధ్యతలు, బాధలు, భయాలు ఉండొచ్చు. ప్రతి ఒక్కరి వ్యక్తిగత జీవితాల్లో ఊహకి అందని మలుపులు చాలానే ఉంటాయి. అలాంటప్పుడు ఎఫ్‌బీలో కనిపించిన ఇతరుల అప్‌డేట్స్‌ని చూసి మన జీవితానికి అన్వయించుకొని నిరుత్సాహ పడడం సరైందేనా?

* మీచుట్టూ మీతో!
* ‘మీ ఆలోచనలు మీ చుట్టూనే తిరగాలి. మీవైన ఆనందాలు.. అభిరుచులు... బలాలు... బలహీనతలు తెలుసుండాలి. మీకేం కావాలి? మీకేం నప్పుతాయి? మీరు ఇతరులకంటే ఎంత భిన్నం?.. లాంటి ప్రశ్నలకు సమాధానాలు వెతకాలి. మీరే ఓ మోడల్‌ అనుకుంటే? మీకు నప్పేవే తీసుకుంటారు. అప్పుడే మీ సోషల్‌ ప్రొఫైల్‌ తీరు తెన్నుల్ని విశ్లేషిస్తూ... మిమ్మల్ని మీరు మలుచుకోగలరు.

పోలికగాళ్లు సోషల్‌వాల్‌పై పోస్టింగ్‌ల్లోనే కాదు. చాలా చోట్ల తారసపడతారు. కొనేదగ్గర.. తినేదగ్గర... మార్కుల్లో... జాబ్‌ల్లో... అన్నింటిల్లోనూ ‘మాదేముందిలే.. ’ అంటూ మీతో పోల్చుకుంటూ గ్యాంగ్‌ల్లో తిరుగుతూనే ఉంటారు. వాళ్లకి వారి అభిరుచులు విలువైనవిగా అనిపించవు. వారి దుస్తులు ఆకట్టుకునేలా కనిపించవు. ఫ్యాషన్స్‌ అంటే వారికి నప్పేవి కాదు. హీరో విజయ్‌దేవరకొండ ధరించేవే. కష్టపడి ఆన్‌లైన్‌ అంగళ్లలో వెతికి వెతికి అరుదైన కలెక్షన్స్‌ కొంటారు. మరుక్షణం ఎఫ్‌బీ వాల్‌పై విజయ్‌ ధరించిన దుస్తులు చూడగానే ‘ఏమున్నాయ్‌రా.. అవిరా డ్రస్‌లంటే?’ అని నీరుగారిపోతారు. ఇలాంటి పోలికగాళ్లకి జీవితంలో కిక్‌ ఎప్పుడు దొరుకుతుంది?

* ఇప్పుడే జీవించండి
* ‘ఏదైనా ప్రయత్నించడంలో బిజీ అయితే పోల్చుకునేందుకు సమయం ఉండదు. పోల్చుకుంటున్నాం అంటే కొత్తగా ప్రయత్నించే ఆలోచన రాదు. మనం ఏం చేస్తున్నామో అందులో సంతోషాన్ని వెతుక్కుంటూ వెళ్తే.. ప్రపంచమే మిమ్మిల్ని మిస్‌ అవ్వడానికి ఇష్టపడదు. నిత్యం సత్కరిస్తూ మీరో స్పెషల్‌ అని చాటి చెబుతుంది.

అంగుళాల తెరపై నిత్యం ఫాలో అవడం కాదు... ఆగి ఆలోచించండి. చుట్టూ చూడండి. గమనించండి. ఊహలకు... ఆపోహలకూ వాస్తవాల్ని జోడించి నిజ జీవితంలోకి రండి. ఆ క్షణాన్ని ఆస్వాదించడాన్ని అలవాటు చేసుకోండి. వాడుతున్న సోషల్‌ మీడియా వేదిక ఏదైనా ప్రైవసీ సెట్టింగ్స్‌ని ఎలా విధిగా ఫాలో అవుతున్నారో... అలాగే మీ ప్రొఫైల్‌ని, మిమ్మల్ని స్పెషల్‌గా మలుచుకోండి.

‘స్పందనల్ని’ ఆశించడం వల్లే!

పోస్ట్‌ చేసే సెల్ఫీలు, ఇతర అప్‌డేట్స్‌కి ఎప్పుడైనా స్పందన సరిగా రాకుంటే అప్పుడే పోల్చుకోవడం మొదలవుతుంది. లైక్‌లు, కామెంట్‌లను లెక్కిస్తుంటారు. గ్రూపుల్లో వందల్లో ఫ్రెండ్స్‌ ఉంటే కామెంట్‌లేమో పదో, ఇరవైయ్యో రావడాన్ని వీళ్లు తట్టుకోలేరు. దీంతో పోల్చుకోవడం.. అనుకరించడం మొదలుపెడతారు. ఇష్టంలేనివి.. నప్పనివాటిని కూడా ప్రయత్నిస్తూ వారిది కాని జీవితంలో గడపడం చేస్తారు. అప్పటి వరకూ తమనే ఓ బ్రాండ్‌గా ఊహించుకుని తిరిన వారు కూడా మార్కెట్‌లోని బ్రాండ్స్‌ని ఫాలో అవ్వడం మొదలుపెడతారు. దీంతో సహజంగా వారిలో కనిపించే ప్రత్యేకతల్ని కోల్పోతుంటారు. సోషల్‌ నెట్‌వర్క్‌ల్లో ఎక్కువ మంది స్నేహితులను పోగేసుకుని ఎక్కువగా ఆశించడంతోనే ఈ సమస్య మొదలవుతుంది. అలాగే, సోషల్‌ మీడియాలో కనిపించేవన్నీ నిజాలు కాదన్న విషయాన్ని గ్రహించాలి. వాస్తవ ప్రపంచానికి దూరంగా తీసుకెళ్లే వర్చువల్‌ వరల్డ్‌ అది. పరిధులు, ప్రైవసీలు పెట్టుకుని వాస్తవికంగా ఆలోచిస్తూ ‘సోషల్‌’ లైఫ్‌లో విహరిస్తే పోలికగాళ్ల బ్యాచ్‌లో మీరు ఉండరు.

- టీఎస్‌.రావు, కౌన్సెలింగ్‌ సైకాలజిస్ట్‌

Tags :

మరిన్ని

జిల్లా వార్తలు

వారెవ్వా! చదువు సుఖీభవ ఈ-నాడు మకరందం రయ్.. రయ్ సిరి విజేత ఈ తరం హాయ్! ఆహా హాయ్ బుజ్జీ స్థిరాస్తి రుచులు విహారి