ఫ్రెండూ ఫ్రెండూ... కావొద్దోయ్‌ ఫ్రెనెమీ!

ఫ్రెండూ ఫ్రెండూ... కావొద్దోయ్‌ ఫ్రెనెమీ!

చేతిలో చేయేసి.. భుజం భుజం రాసుకొని తిరిగేది స్నేహితుడు... దూరంగా ఉంటూనే కీడు చేయాలని చూసేవాడు శత్రువు... కష్టం సుఖం.. సంతోషం బాధ.. అన్నింట్లో ఫ్రెండ్‌ పక్కనుంటే భరోసా... గిట్టని వాళ్లకి సాధ్యమైనంత దూరంగా ఉంటే మనసుకి నిశ్చింత... ఈ హితుడూ, విరోధి కాకుండా మూడో కేరక్టరూ ఉందండోయ్‌! తనే ఫ్రెనెమీ... మిత్రుడి రూపంలో మన పక్కన ఉంటూనే గోతులు తీసే శత్రువు! ఇలాంటి వాళ్లను పసిగట్టడమెలా? పని పట్టడమెలా? లక్షణాలేంటి? లక్షణంగా ఉండటమెలాగో చెబుతున్నారు నిపుణులు.

స్నేహం వదిలేయండి

నిజమైన స్నేహితుడు కష్టాల్లో ఆదుకుంటాడు. మంచి చేస్తే పొగుడుతాడు. పక్కదారి పడితే సహేతుకంగా విమర్శిస్తాడు. ఫ్రెనెమీకి మనలోని లోపాల్ని ఎత్తిచూపుతూ, నలుగురిలో చులకన చేయడమే లక్ష్యం. ఒకవేళ మన ముందు పొగిడినా వెనక కుటిల ప్రయత్నాలు మానడు. ఇలాంటివారితో అనుబంధాలు, వృత్తి, ఆర్థికంగా... అన్నింట్లో మైనస్సే. వీరి మాటలు, చేతల్లో అసూయ, ద్వేషం, కపటత్వం జాగ్రత్తగా గమనిస్తే కొట్టొచ్చినట్టు కనిపిస్తుంది. వీరితో స్నేహం కొనసాగించాలనుకుంటే మొహమాటం లేకుండా పద్ధతి మార్చుకొమ్మని మొహం మీదే చెప్పేయాలి. మారకపోతే ఆ స్నేహాన్ని వదిలేయడమే ఉత్తమం.

- శ్రీనివాస సుబ్రహ్మణ్యం, కెరీర్‌ కౌన్సిలర్‌

స్నేహమేరా జీవితం.. స్నేహమేరా శాశ్వతం అనుకోని కుర్రకారు అరుదే. కబుర్లు చెప్పడానికి.. కలిసి చదువుకోవడానికి.. సరదాలకు.. ఆపదల్లో ఆదుకోవడానికి.. సలహాలివ్వడానికి.. ఆర్థిక సమస్యలు గట్టెక్కించడానికి.. ప్రతి అవసరానికీ ఫ్రెండే కావాలి. మన జీవితంలో అంత ప్రాముఖ్యం ఇచ్చే మిత్రుల్లోనే కొందరు మనకి నష్టం చేకూర్చే వాళ్లు ఉన్నారంటే పంటికింద రాయిలా మనకెంత బాధ?
కనిపెడదామిలా
కాస్త మనసు పెడితే ఎవరు స్నేహితులో, ఎవరు ఫ్రెండ్‌ రూపంలో ఉన్న శత్రువో తెలుసుకోవడం కష్టమేం కాదంటారు మనస్తత్వ నిపుణురాలు వైదేహీరావు. ఆమె చెబుతున్న ఫ్రెనెమీ లక్షణాలివి.

తొందరెక్కువ: ఫ్రెనెమీకి తొందరెక్కువ. స్నేహం మొదలైన తక్కువ కాలంలోనే అతి సాన్నిహిత్యం ఆశిస్తారు. ప్రేమలు, సంబంధాలు, వ్యక్తిగత విషయాలు అన్నీ ఆరా తీస్తారు. లంచ్‌.. లాంగ్‌టూర్లు.. పార్టీలు.. ఇలా అన్నింటికీ తొందర పెట్టేస్తుంటారు.
పంచుకోవడం: వాళ్ల జీవితానికి సంబంధించి ప్రతి విషయం, ప్రేమ, పెళ్లి, కెరీర్‌లాంటి వ్యక్తిగత వివరాలు పంచుకుంటారు. అడక్కముందే చిన్నచిన్న పనులు చేసి పెడతారు. మన భావోద్వేగపు పునాదుల మీద దృఢమైన బంధాల్ని అల్లేస్తారు.
తూలనాడే స్వభావం: ఇతరుల ముందే మనల్ని విమర్శిస్తారు. దీన్నే హాస్యమంటారు. మన మనసు గాయపడితే లోలోపల సంతోషిస్తూనే ‘హే.. జస్ట్‌ అయామ్‌ జోకింగ్‌.. డోన్ట్‌ టేకిట్‌ సీరియస్‌ యార్‌’ అని కవర్‌ చేసేస్తారు. వ్యంగ్య వ్యాఖ్యానాల్లో దిట్టలు.
పొగడ్తలుండవు: పరిచయమైన మొదట్లో ప్రతి చిన్నదానికీ పొగడ్తలు కురిపించినవారే తర్వాత మనం మంచి పనిచేసినా, పెద్ద విజయాలు సాధించినా పట్టించుకోరు. నీ విజయం గాలివాటమని తేలిక చేసి మాట్లాడతారు. కనీసం మన ఫేస్‌బుక్‌ ఫొటోకి లైక్‌ కొట్టే, కామెంట్‌ చేసే పెద్ద మనసూ ఉండదు.
ఎగదోసే రకం: స్నేహితుడు ఇబ్బందుల్లో ఉంటే పైకి అయ్యోపాపం అంటున్నా లోలోపల తెగ సంతోషిస్తారు. బంధువులు, స్నేహితులతో గొడవ పడితే సర్దిచెప్పడం మాని ‘నీ గొడవ ఎంతవరకొచ్చింది.. తనతో మాట్లాడకపోతేనే బెటర్‌’ అని బంధాల్ని చీల్చాలని ప్రయత్నిస్తారు.
ఫెయిలైతే సంతోషం: మనం ఎదిగితే సంతోషించేది స్నేహితులు.. అసూయ, ద్వేషం చూపిస్తూ మన పతనాన్ని కోరుకునేది ఫ్రెనెమీ. ఏదైనా పని మొదలుపెడితే సాయం చేస్తున్నట్టు నటిస్తూనే, ఆ పనిలో వైఫల్యం చెందడానికి తెర వెనక ప్రయత్నాలు చేస్తారు.
మనసు నొప్పించడం: లంచ్‌కి రమ్మంటారు. కావాలనే మనకి నచ్చని మెనూ సిద్ధం చేస్తారు. కొత్త హెయిర్‌స్టైల్‌తో వస్తే.. ‘హెయిర్‌ కటింగ్‌ చేయించుకున్నావా?’ అంటారే తప్ప నీ స్టైల్‌ బాగుంది అనరుగాక అనరు.

అంతా మనమంచికే
కాలేజీ, ఆఫీసు.. మరోచోటు.. ఎక్కడైనా ఇలాంటి ఫ్రెనెమీలకు కొదవుండదు. మనపక్కనే ఉంటూ నష్టం చేసేవాళ్లు ప్రమాదకరమే అయినా వాళ్లతో స్నేహం ఒకందుకూ మంచిదే అంటారు ఫ్రొ.శ్రీధర్‌. వాళ్ల సంతోషం కొద్దీ మనల్ని విమర్శిస్తున్నా మన లోపాలేంటో చెప్పకనే చెబుతారు. పరోక్షంగా మన సామర్థ్యాన్ని నిరూపించుకోవాలనే తపన రగిలిస్తారు. ఒకరి మనసు నొప్పించకుండా ఎలా ఉండాలో వీళ్లని చూసి నేర్చుకోవచ్చు. నిస్సారంగా, చప్పగా సాగిపోతున్న జీవితానికి ఫ్రెనెమీలు తోడైతే కావాల్సినన్ని మలుపులు, నాటకీయత జోడైనట్టే. వారి ప్రతి అడుగునూ సరదాగా తీసుకుంటే ఎంజాయ్‌ చేయాలనుకునేవాళ్లకి ఎంజాయ్‌ చేసినంత. ఏం చేసినా తిట్టడానికో, విమర్శించడానికో వాళ్లు కాచుకొని ఉంటారన్న స్పృహ ఉంటే ముందు జాగ్రత్తగా ఏ తప్పూ చేయకుండా ఉండొచ్చు. ఈ ప్రియమైన శత్రువులు మనకి హాని కలిగించాలని ప్రయత్నిస్తూనే మనని మనం అప్రమత్తంగా ఉండేలా చేస్తారు.

తెరవేల్పులకూ తప్పలేదు

మామూలు జనాలకే కాదు తెరపై నటిస్తూ అభిమానుల్ని కనికట్టు చేసే హాలీవుడ్‌, బాలీవుడ్‌ తారలకూ ఫ్రెనెమీ బాధలు తప్పలేదు. స్నేహితులం అంటూనే గొడవలు పడ్డ తారలెందరో. వారిలో కొందరు.

లారెన్‌ కొన్రాడ్‌- హైదీ మోంటాగ్‌

‘ది హిల్స్‌’ రియాలిటీషోతో ఇద్దరి స్నేహం మొదలైంది. ఆపై మాకు మించిన స్నేహితులు లేరన్నట్టే ప్రవర్తించారు. హైదీ మోంటాగ్‌ బోయ్‌ఫ్రెండ్‌ రాకతో సీన్‌ సితారైంది. గొడవ మొదలై, ముదిరి కొట్టుకుంటూ కెమేరాలకీ చిక్కారు. హైదీ స్వయంగా క్షమాపణలు కోరితే ‘నేన్నిన్ను క్షమిస్తున్నా. అలాగే నీ స్నేహాన్నీ వదిలేస్తున్నా’ అంది లారెన్‌.

రణ్‌బీర్‌కపూర్‌- సోనమ్‌కపూర్‌

‘సావరియా’తో చెలిమి కట్టిందీ జంట. పార్టీలు, సినిమా ఫంక్షన్లు ఎక్కడ చూసినా వీళ్లే. పేరొచ్చినకొద్దీ వారిలో అసూయ పొడసూపింది. ‘కాఫీ విత్‌ కరణ్‌’లో ‘సోనమ్‌ అందగత్తే కాదు.. తనొట్టి డ్రామాక్వీన్‌’ అన్నాడు రణ్‌బీర్‌. అగ్గి రాజుకుంది. ‘రణ్‌బీర్‌ని ఎవరైనా ప్రేమిస్తే అది ఇష్టపడేవాళ్ల గొప్పతనమే. తనకెలాంటి అర్హతా లేదు’ అంది. ఫ్రెనెమీల మాటల పోటీ కొనసాగుతూనే ఉంది.

కిమ్‌ కార్దాషియాన్‌- పారిస్‌ హిల్టన్‌

పారిస్‌ హిల్టన్‌ స్టార్‌గా ఉన్నపుడు కిమ్‌ కార్దాషియాన్‌ ప్రపంచానికి తెలియదు. అయినా ఇద్దరూ క్లోజ్‌ఫ్రెండ్స్‌. కిమ్‌ సెక్స్‌ టేపులు బయటికి రావడం, కీపింగ్‌ అప్‌ విత్‌ కార్దాషియాన్స్‌తో ఒక్కసారిగా పాపులర్‌ కావడంతో పారిస్‌లో అసూయ మొదలైంది. ఒక ఇంటర్వ్యూలో కిమ్‌ శరీరభాగాలపై పారిస్‌ అనుచిత వ్యాఖ్యలు చేసింది. స్నేహితులు శత్రువులైపోయారు.

కరీనా కపూర్‌- ప్రియాంకా చోప్రా

‘ఐత్‌రాజ్‌’లో కలిసి నటించారు. బొమ్మ తెరపై పడకముందే మంచి స్నేహితులయ్యారు. ప్రియాంక ఆ సినిమాకే ‘బెస్ట్‌ విలన్‌’ అందుకుంది. ఇద్దరి మధ్య దూరం మొదలైంది. మేం స్నేహితులం అని చెప్పుకుంటూనే విమర్శలు చేసుకునేవారు. ఆపై ఓ కార్యక్రమంలో ప్రియాంక సైఫ్‌అలీఖాన్‌తో ఆడిపాడి గుండెలకు హత్తుకుంది. అప్పటికే సైఫ్‌తో పెళ్లికి సిద్ధమైన కరీనాకి ఇది నచ్చక నేరుగానే విమర్శలకు దిగింది.

టేలర్‌ స్విఫ్ట్‌-కేటీ పెర్రీ

యువతరంగ్