విరాట్‌ లాంటి చిసిల్స్‌ బాడీ కావాలా?

అవీ.. ఇవీ

కోహ్లీ... ఇండియన్‌ క్రికెట్‌ జట్టు కెప్టెన్‌గానే కాకుండా నేటి తరానికి అన్నింట్లోనూ ఓ ఐకాన్‌. ఫ్యాషన్స్‌లో ఎప్పుడూ ముందుండే కోహ్లీ... ఫిట్‌నెస్‌లోనూ టీన్స్‌కి ప్రేరణే. ఐదేళ్లుగా అతని ఫిట్‌నెస్‌ను అధిగమించే ఆటగాడు లేడంటే అతిశయోక్తి కాదు. మరి సన్నని దృఢమైన శరీరం ఆయనకు ఎలా వచ్చింది? క్రమం తప్పని వ్యాయామంతో పాటు ఈ నాలుగు అంశాలు పాటించి చూడండి. మీరూ అలా చిసిల్స్‌ బాడీతో ఆకట్టుకోవచ్చు.

1 ఆహార నియంత్రణ: ఇటీవల ఒక ఇంటర్వ్యూలో విరాట్‌ కోహ్లీ మాట్లాడుతూ తనకు ఎంతో ఇష్టమైన బటర్‌ నాన్‌, బటర్‌ చికెన్‌ను ఐదేళ్లుగా తినడం లేదని చెప్పాడు. అంటే అతను ఆహార విషయంలో ఎంత జాగ్రత్తగా ఉంటున్నాడో ఈ విషయం చెప్పకనే చెబుతుంది. ఇదే కాదు జంక్‌ఫుడ్స్‌ ఏవైనా సరే దూరం పెట్టేస్తాడు కోహ్లీ. వీలైనంత వరకూ పోషకాహారమే తీసుకుంటూ తన ఫిట్‌నెస్‌ను కాపాడుకుంటూ వస్తున్నాడు.
2 తన చిసిల్స్‌ బాడీని కాపాడుకునేందుకు ప్రొటీన్‌ డైట్‌ ఫాలో అవుతుంటాడు. దృఢమైన దేహానికి ప్రొటీన్లు ఎంత అవసరమో మనందరికీ తెలుసు. అందుకే ప్రతీరోజు తన ఆహారంలో ప్రొటీన్లు ఎక్కువగా ఉండేట్లు చూసుకుంటాడు.
3 కోహ్లీ శరీరాన్ని గమనిస్తే కచ్చితంగా మనకు ఒక అంశం స్ఫురిస్తుంది. తను కండలు తిరిగిన దేహంతో దృఢంగా ఉంటాడు. కానీ పెద్దపెద్ద కండలు ఉండవు. అదే అతని ఫిట్‌నెస్‌ రహస్యం. కండరాలు ఎప్పుడూ స్థిరంగా ఉంచుకునేందుకు అవసరమైన కసరత్తులు క్రమం తప్పకుండా చేస్తుంటాడు. ల్యాడర్‌డ్రిల్స్‌, కోన్‌ డ్రిల్స్‌ వంటివి వారంలో 5నుంచి 6రోజులు చేస్తూ తన చిసిల్స్‌ బాడీని కాపాడుకుంటున్నాడు.
4 కోహ్లీ ఒక్క రోజులో ఇంత ఫిట్‌నెస్‌ సాధించలేదు. అదంతా క్రమబద్ధమైన సాధన. ఏళ్ల తరబడి ఓపికతో వ్యాయామాలు, ఆహార నియమాలు పాటిస్తూ వచ్చి ఈ రోజు మనకు ఆదర్శంగా నిలుస్తున్నాడు. అందుకే యువత దీన్ని దృష్టిలో ఉంచుకొని దీర్ఘకాల ప్రణాళికతో ముందుకు సాగాలి.