close

సంపాదకీయం

ఈసీ పెడసరం

డంచెల పదిహేడో సార్వత్రిక ఎన్నికల సమరం ముగిసి, విజేతలెవరో విజితులెవరో వెల్లడయ్యే నిర్ణాయక ఘట్టం ముంగిట యావత్‌ జాతీ ఉత్కంఠతో నిరీక్షిస్తోంది. దేశవ్యాప్తంగా చెదురుమదురు ఘటనలు తప్ప ఈ ఎలెక్షన్లు ప్రశాంతంగా స్వేచ్ఛగా సక్రమంగా ‘పారదర్శకం’గానూ జరిగాయంటూ- తుది దశ పోలింగ్‌ తరవాత ఎన్నికల సంఘం సగర్వంగా భుజకీర్తులు తొడుక్కుంది. ఏప్రిల్‌ 11నాటి తొలి దశలోనే ఆంధ్రప్రదేశ్‌ శాసనసభాపతిపై భౌతిక దాడి లగాయతు మే 19న పశ్చిమ్‌ బంగ అల్లర్లవరకు ప్రశాంతతను భంగపరచిన హింసాఘట్టాల్ని ఈసీ తేలిగ్గా తీసిపారేసింది. ఈ లెక్కలేనితనంతోపాటు విధ్యుక్త ధర్మాన్ని నిష్ఠగా నిర్వర్తించడంలో పలు లోటుపాట్ల కారణంగానూ ఎన్నికల సంఘంపై విమర్శలవాన గట్టిగానే కురిసింది. దేశంలో మొత్తం ఓటర్ల సంఖ్య తొంభై కోట్లకు పైబడినా, ప్రజాస్వామ్య మేరునగం విశ్వరూపానికి గౌరవం, మన్నన దక్కేలా పనితనం కనబరచడంలో ఈసారి ఈసీ చతికిలపడింది. నామపత్రాల దాఖలు చివరి తేదీ దాకా ఓటరు జాబితాలో మార్పులూ చేర్పుల్ని అనుమతించి అర్హులైన ప్రతి ఒక్కరూ రాజ్యాంగబద్ధ హక్కు వినియోగించుకోవడానికి దోహదపడతామన్న కమిషన్‌- అలవాటుగా చేతులెత్తేసింది. డెబ్భయ్యో పడిలో అడుగుపెట్టి ఎన్నికల నిర్వహణలో అపార అనుభవం గడించిన సంఘం- ఓటరు జాబితాల్ని ఇప్పటికీ పకడ్బందీగా రూపొందించలేకపోవడం, దిగ్భ్రాంతపరచే కఠోర యథార్థం. నూరుశాతం కచ్చితత్వం కొరవడ్డ జాబితాల మూలాన ఓటు హక్కుకు తూట్లుపడ్డ దౌర్భాగ్యం  తు.చ. తప్పకుండా ఈసారీ పునరావృతమైంది. ఓటి జాబితాల దురవస్థకు జతపడి వివిధ రాష్ట్రాల్లో ఈవీఎమ్‌లు, వీవీప్యాట్లు మొరాయించిన ఘటనలు పెద్దయెత్తున వయోజనుల సహనాన్ని పరీక్షించాయి. మన ఈవీఎమ్‌లు దుర్నిరీక్ష్యమైనవని ఈసీ పదేపదే చాటినా, అనేక పోలింగ్‌ కేంద్రాల్లో అవి మొండికేసిన ఉదంతాలు- నిర్వాచన్‌ సదన్‌ పరువును రోడ్డుకీడ్చాయి. ఒక గుర్తుకు ఓటేస్తే రశీదు యంత్రంలో వేరే గుర్తు ప్రత్యక్షమైందన్న కథనాలు, ఈసీ విశ్వసనీయతనే సూటిగా ప్రశ్నించాయి.

కేంద్ర ఎన్నికల ప్రధానాధికారిగా ఎం.ఎస్‌.గిల్‌ లోగడ స్పష్టీకరించినట్లు, గుర్తింపు పొందిన రాజకీయ పక్షాలు తన చుట్టూ ఓ వృత్తం గీస్తే ఎటూ బెసగకుండా నడిమధ్యన నిలవడమే ఈసీ రాజ్యాంగ నైతిక ధర్మం. ఎన్నికల పోరుకు సంబంధించి వ్యూహ ప్రతి వ్యూహాల్లో తలమునకలు కావాల్సిన దశలో, ఎలెక్షన్ల సక్రమ నిర్వహణకోసం పార్టీలు ఈసీతో న్యాయపోరాటం చేయాల్సి రావడం దురదృష్టం. ఏ పక్షపాతాలూ లేవని అందరూ విశ్వసించేలా మెలగాల్సిన ఎన్నికల సంఘం ఉద్దేశాలు, చర్యలు దోషరహితంగా లేవని 66మంది మాజీ ఉన్నతాధికారులు రాష్ట్రపతి రామ్‌నాథ్‌ కోవింద్‌కు మహజరు సమర్పించాల్సి రావడం- నిర్వాచన్‌ సదన్‌కు శోభస్కరమా? ఫలానా అభ్యర్థి నుదుట బొట్టు మార్చినట్లు భర్తను మారుస్తుందనేంత అధమ స్థాయికి చేరిన ప్రచార సరళి, మాజీ ప్రధానమంత్రిని ‘భ్రష్టాచారీ నంబర్‌ 1’గా ప్రధాని మోదీ తూష్ణీకరించడంతో పాతాళపు లోతులు తాకింది. ప్రవర్తన నియమావళి ఉల్లంఘనలపై ఆరోపణలు వెల్లువెత్తినా, ‘కోడ్‌’కు చట్టబద్ధత లేక మిన్నకుండిపోయానన్న ఈసీ వాదనను సర్వోన్నత న్యాయస్థానమే తోసిపుచ్చింది. మోదీ, అమిత్‌ షా ఉల్లంఘనకు పాల్పడ్డారా లేదా ఇదమిత్థంగా తేల్చాల్సిందేనని సుప్రీంకోర్టు పట్టుపట్టడంతో- ఎన్నికల సంఘం ఆ ఇరువురికీ హడావుడిగా ‘క్లీన్‌ చిట్‌’ దయచేయడం వివాదాస్పదమైంది. త్రిసభ్య ఎలెక్షన్‌ కమిషన్‌లో సభ్యుడైన అశోక్‌ లావాసా తన భిన్నాభిప్రాయాన్ని కనీసం నమోదైనా చేయడం లేదని ఆక్రోశిస్తే- ఏం జరిగింది? అందుకు తావే లేదని సీఈసీ అరోడా తోసిపుచ్చారు. సుప్రీం ధర్మాసనంలోనే ఎవరైనా న్యాయమూర్తి విభేదిస్తే, ఆ అంశాన్ని తీర్పులో విధిగా పొందుపరుస్తారు. ప్రజాస్వామ్య వ్యవస్థలో అత్యంత కీలకమైన ఎన్నికల నిర్వహణ బాధ్యతలు చేపట్టిన ముగ్గురిలో ఒకరు భిన్నగళంతో స్పందిస్తే- దాన్ని పరిగణనలోకి తీసుకొనకపోవడమేమిటి?

నిష్పాక్షికత, సుదృఢ వ్యవహారశైలి సహజాభరణాలైతే ఎన్నికల సంఘం ఎంతటి విశేష ప్రభావాన్వితం కాగలదో శేషన్‌ జమానా సోదాహరణంగా చాటిచెప్పింది. దేశ ఎన్నికల రంగాన్ని చెండుకు తింటున్నాయంటూ ‘చండశాసనుడు’ ఏకరువు పెట్టిన దశ మహాపాతకాలు, ఆయన పదవీ వారసుల ప్రభావ శూన్యత కారణంగా అడ్డూ ఆపూ లేకుండా రెచ్చిపోతున్నాయి. దేశం నలుమూలలా పార్టీలు అభ్యర్థులు యథేచ్ఛగా నియమోల్లంఘనలకు పాల్పడే ‘స్వేచ్ఛ’, నల్లధన ప్రవాహాలు ‘సక్రమంగా’ కొనసాగే దురవస్థ ప్రస్తుత ఎన్నికల్లో మరింతగా కళ్లకు కట్టాయి. గెలుపు గుర్రాల పేరిట నేరచరితుల్ని అక్కున చేర్చుకోవడంలో పార్టీల పోటాపోటీ, మకిలిపట్టిన వాళ్ల జాతకాల్ని బహిర్గతం చేస్తానన్న ఈసీ వీరాలాపాలకు గాలి తీసేసింది. విశృంఖల ప్రలోభాలు, రాజకీయ వాక్కాలుష్యం ‘ప్రజాస్వామ్య కుంభమేళా’ను శాయశక్తులా అప్రతిష్ఠపాలు చేశాయి. వీవీప్యాట్లను ప్రవేశపెట్టిందే ఎన్నికల విశ్వసనీయతను నిలబెట్టడానికైనా, వాటిని అలంకారప్రాయంగా మార్చడమే స్వీయాభిమతమన్నట్లుగా కమిషన్‌ వ్యవహరించడం దిగ్భ్రాంతపరచింది. కొన్నిచోట్ల ఈవీఎమ్‌లను తరలించినట్లు, వాటిలో అవకతవకలకు పాల్పడినట్లు సామాజిక మాధ్యమాల్లో గగ్గోలుపుట్టినా- అవన్నీ వట్టి వదంతులుగా ఎన్నికల సంఘం కొట్టిపారేసింది. మాజీ రాష్ట్రపతి ప్రణబ్‌ ముఖర్జీ వ్యాఖ్యానించినట్లు, అన్ని శంకల్నీ చెదరగొట్టాల్సిన బాధ్యత కమిషన్‌దే! 2022నాటికి ఏడున్నర దశాబ్దాల స్వపరిపాలన పూర్తి చేసుకోనున్న స్వతంత్ర భారతావనిలో, నిష్పాక్షిక ఎన్నికల వ్యవస్థను రూపొందించుకోలేకపోవడం-జాతికే తలవంపులు. లా కమిషన్‌ సిఫార్సు మేరకు స్వతంత్ర ఎంపిక సంఘం చేతులమీదుగా కమిషనర్ల నియామకాలు, రాజ్యాంగ వ్యవస్థగా ఈసీ ఔన్నత్యాన్ని పరిరక్షించే పకడ్బందీ కార్యాచరణల్లో జాప్యమిక ఎంతమాత్రం పనికిరాదు!

జిల్లా వార్తలు

దేవ‌తార్చ‌న

రుచులు
+

© 1999- 2019 Ushodaya Enterprises Pvt.Ltd,All rights reserved.
Powered By Margadarsi Computers

Android PhonesApple Phones

For Editorial Feedback - eMail: infonet@eenadu.net
For Digital Marketing enquiries Contact : 9000180611, 040 - 23318181 eMail :marketing@eenadu.net
Best Viewed In Latest Browsers

Terms & Conditions   |   Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.