వైవిధ్యభరిత కథలను ఎంచుకుంటూ వరుస విజయాలతో దూసుకెళ్తోంది నటి సమంత. ఇప్పుడామె ట్విటర్‌ గూటిలో ఎమోజీ బొమ్మగా మారి ఓ అరుదైన ఘనత సొంతం చేసుకుంది. ప్రస్తుతం ఆమె ‘ది ఫ్యామిలీమెన్‌ 2’ వెబ్‌సిరీస్‌లో ఓ కీలక పాత్రలో కనిపించనున్న సంగతి తెలిసిందే. మనోజ్‌ బాజ్‌పాయ్‌ ప్రధాన పాత్రలో నటించారు. రాజ్‌ డీకే దర్శకత్వం వహించారు. ఫిబ్రవరి 12న ప్రముఖ ఓటీటీ వేదిక అమెజాన్‌ ప్రైమ్‌లో విడుదలవుతోంది. ఈ నేపథ్యంలోనే ప్రచార పర్వంలో భాగంగా అమెజాన్‌ ప్రైమ్‌ ట్విటర్‌లో ఓ ఎమోజీని విడుదల చేసింది. దీంట్లో మనోజ్‌తో పాటు సమంత కూడా దర్శనమిచ్చింది. ట్విటర్‌లో ఇలా ఎమోజీని పొందిన తొలి భారతీయ నటి సామ్‌ మాత్రమే. ఆమె ఇందులో ఆర్మీ డ్రెస్‌లో సెల్యూట్‌ చేస్తున్నట్లు కనిపించింది. తానిలా ఎమోజీలో కనిపించడం పట్ల సమంత ట్విటర్‌ వేదికగా సంతోషాన్ని వ్యక్తం చేసింది.