ఇంటర్నెట్‌డెస్క్‌: ప్రపంచవ్యాప్తంగా బాక్సాఫీస్‌ వద్ద కాసుల వర్షాన్ని కురిపిస్తున్న చిత్రం ‘జోకర్‌’. టాడ్‌ ఫిలిప్స్‌ దర్శకత్వంలో తెరకెక్కిన ఈ చిత్రం ఇప్పటికే బిలియన్‌ డాలర్ల కలెక్షన్లతో దూసుకుపోతోంది. ఇప్పటి వరకు విడుదలైన హాస్య నేపథ్యం కలిగిన చిత్రాల్లో ‘జోకర్‌’ అత్యధిక వసూళ్లు సాధించిన సినిమాగా నిలిచింది. ఇందులో జోక్విన్‌ ఫొనిక్స్‌ నటనతో పాటుగా హాస్యం, భావోద్వేగాలు ప్రధానంగా ప్రేక్షకులను ఆకట్టుకున్నాయి.

ఈ నేపథ్యంలో హాలీవుడ్‌లో ఓ ఆసక్తికర వార్త చక్కర్లు కొట్టింది. దర్శకుడు టాడ్‌ ఫిలిప్స్‌ ‘జోకర్’కు సీక్వెల్‌ తీసే పనిలో ఉన్నారని, స్క్రిప్ట్‌పై పనిచేస్తున్నారని టాక్‌ వినిపించింది. ఈ వార్తలను దర్శకుడు టాడ్‌ ఖండించినట్లు సమాచారం. అక్టోబరు 7న తాను ఈ విషయమై వార్నర్‌ బ్రదర్స్‌ను తాను కలవలేదని అన్నాడట. అయితే అదే సమయంలో ‘‘ భవిష్యత్‌లో ఏదో ఒక రోజు ‘జోకర్‌’ సీక్వెల్‌ తెరకెక్కదని ఎవరూ చెప్పలేరు’’ అని అన్నట్లు ఓ ఆంగ్ల పత్రిక తెలిపింది. అంతేకాదు, ప్రస్తుతానికి సీక్వెల్‌ గురించి చిత్ర బృందం ఎలాంటి ఆలోచనా చేయడం లేదట.